Colaboramos no desenvolvemento da plataforma web do novo centro GaiásTech da Xunta de Galicia, que acaba de inaugurar a súa actividade, centrada na transformación dixital da nosa comunidade. Localizado na Cidade da Cultura, actuará como un espazo para a demostración e experimentación en tecnoloxías avanzadas e de concentración do coñecemento tecnolóxico ao servizo das empresas, as administracións e a sociedade galega.

O proxecto web

A plataforma gaiastech.xunta.gal recolle toda a información sobre o novo centro, as súas actividades e servizos, centrando os seus contidos no impulso do ecosistema dixital galego.

Desenvolvido en Drupal 8, o portal busca ser o reflexo virtual do propio GaiasTech, dando visibilidade e apoio a todas as actividades que se xeren ou nas que se colabore, aos servizos que se ofrezan e aos recursos que se poñan a disposición das persoas usuarias, facilitando e dinamizando a súa interacción co centro e co seu ecosistema dunha maneira sinxela, dinámica e atractiva.

O centro

GaiásTech será un escenario central para a posta en marcha da Estratexia Galicia Dixital 2030, especialmente do seu eixo transversal, que ten o obxectivo de promover a especialización tecnolóxica a través do reforzo das capacidades e infraestruturas dixitais de Galicia.

A súa superficie, de máis de 500 metros cadrados, contará cun espazo de inmersión interactivo, orientado a experiencias de realidade virtual e aumentada. Conta tamén con salas de ideación con equipos interactivos para acoller actividades e desenvolver proxectos. E ofrecerá servizos como o GaiasTechCloud, para a realización de probas de software na nube, demostracións de solucións tecnolóxicas, reservas de espazos ou o desenvolvemento de xornadas temáticas.

De maneira paralela a este espazo físico, GaiasTech dispoñerá dun “xemelgo” dixital no que se localizará a axenda tecnolóxica de Galicia, dispoñerá dos seus propios espazos virtuais e actividades e permitirá a retransmisión e participación non presencial en calquera actividade.