BalaKDix4.0

Balidea Consulting & Programming S.L. e Kaldos Formación e Consultoría S.L. desenvolven o proxecto BalaKDix4.0 para a dixitalización de procesos de negocio, a través dos cales se relacionan as súas actividades empresariais. Este proxecto foi beneficiario na convocatoria 2018.2 das axudas do IGAPE Á DIXITALIZACIÓN INDUSTRIA 4.0, cofinanciadas polo Fondo Europeo de Desenvolvemento Rexional no marco do programa operativo FEDER Galicia 2014-2020.

O desenvolvemento baséase na implementación, adaptación e configuración dun sistema de planificación e xestión de recursos empresariais, que supoñerá un incremento substancial das respectivas cadeas de valor, e unha mellora na integración funcional dos seus procesos operativos principais no ámbito comercial e loxístico.

O proxecto define dous obxectivos fundamentais:

1) Dotar ás empresas, a nivel individual, de capacidade funcional para realizar todas as tarefas de xestión relacionadas coas súas diferentes áreas funcionais. Esta capacidade funcional deberá estar integrada nun único sistema, permitindo aumentar a cadea de valor empresarial mediante a integración e optimización de datos e procesos.

2) Proporcionar unha contorna de integración de procesos operativos inter-empresariais, que optimice as relacións establecidas como cliente e provedor.

De acordo co primeiro obxectivo, a solución debe proporcionar cobertura funcional sobre os seguintes aspectos:

• *Xestión integral de clientes e provedores, permitindo o seu rexistro, control e clasificación.
• *Sistema de seguimento de relacións con clientes e provedores ( CRM).
• *Xestión do ciclo completo dos pedidos de compras, desde orzamentos a pedidos consolidados.
• *Xestión do ciclo completo de pedidos de venda, desde o proceso de orzamento a pedido consolidado. Integración co ciclo de análise de oportunidades que permite xestionar iniciativas, licitacións e concursos.
• *Xestión de facturación, tanto de compras como vendas.
• *Contabilidade financeira adaptada á normativa vixente do Plan Xeral Contable de España, coas ferramentas necesarias para a integración dixital de procesos coas administracións públicas (SII e modelos de xeración automática de informes para a AEAT).
• *Contabilidade analítica que proporcione ferramentas necesarias para a análise da actividade, fornecendo información útil para a toma de decisións.
• *Xestión de stocks, almacéns e localizacións para o control da mercadoría que se atopa nas instalacións da compañía, xestión de albaráns internos e de entrada/saída, e control de trazabilidade.
• *Xestión da frota de vehículos, para levar o control dos distintos vehículos propiedade da empresa, contratos de aluguer/leasing, control de gastos, revisións, etc.
• *Xestión de recursos humanos, que permita a xestión dos datos de empregados, procesos de selección, xestión de ausencias, control de tarefas, etc.
• *Xestión de proxectos, permitindo levar o control da evolución dos proxectos de desenvolvemento, tarefas, etapas e esforzo investido. Control e xestión da rendibilidade.

Polo que respecta ao segundo obxectivo, o sistema proporcionará capacidade para integrar procesos operativos entre ambas as empresas, que faciliten aspectos fundamentais relacionados con:

• *Integración de procesos automáticos de pedidos e facturación.
• *Integración da xestión de proxectos comúns ou subcontratados.